حلم بسيط وقفنى عن تحقيق حاجات كتير,
وكل الحكاية تربيزة كمبيوتر ..
تبدأ الحكاية لما كنت فى ابتدائى واتعملى المكتب -قال يعنى هذاكر عليه- وللأسف كنت أقصر من إنى أقعد عليه مرتاحة :D
ومحاولات مستميتة إنى اقعد اذاكر عليه واللى كانت بتنتهى دايما بالفشل
وبعد فترة يظهر الكمبيوتر فى حياتى ويكون مصيره برضه فوق المكتب
اللى عمرى ما استريحتله
ويتنقل الكمبيوتر ما بين تربيزة والمكتب الموعود
وفى أغلب الآوقات كانت الشاشة بتبقى تقريبا ع المخدة جنب الكيبورد والماوس
ودايما يكون حلمى إنى اشترى تربيزة كمبيوتر تخلينى أقعد مرتاحة
واعرف أشتغل على النت براحتى
بدل منا بكسل أعمل أى حاجة بسبب القعدة اللى مش مريحانى
وبدل ما أشترى تربيزة كمبيوتر
اشتريت لاب توب قال يعنى هقعد ع السرير بيه مرتاحة
وللأسف الحلم برضه لسه متحققش وعلى كده بقالى أكتر من 9 سنين تقريبا
أحلام كتير متعلقة واحلام كتير ماتت بسبب تربيزة الكمبيوتر
وعشان كده انا قررت إن شاء الله أنزل أشتريها النهردة
يمكن يكون حظ المدونة دى أحسن من اللى قبلها
واللى قفلتها بسب إنى مش عارفة اقعد اكتب فيها
العبرة من الحكاية الطويلة العريضة دى بتفسر مثل شعبى بيقول
"حجة البليد مسح الدكة "
وأنا همسح الدكة لما نشوف أخرتها
دمتم بخير
أمنيتى ..
ليست هناك تعليقات:
إرسال تعليق